Evento: CONVERSA AO REDOR DA OBRA DE ANTÓN LAMAZARES

Unha visión ampla e comprensiva da obra de Antón Lamazares a través da súa produción artística e do seu periplo vital. Unha viaxe no tempo a través das obras resultantes do traballo e da entrega ao singular exercicio de querer mostrar.

Con esta conversa, pretendemos achegarnos á obra de Antón Lamazares co propósito de revisar cincuenta anos de traballo, dedicación, investigación e estudo. Aproveitando a oportunidade que nos brinda a súa exposición no CGAC, reflexionaremos acerca da obra dun dos artistas máis singulares do contexto artístico galego e español, cuxa relación co mundo foi unha constante ao longo da súa carreira.

Abordar o estudo de cincuenta anos de traballo a partir dunha selección baseada nos núcleos/series de obras producidas no transcurso destes anos. Poder revisitar e redescubrir, volver ao principio, volver iluminar e facer resplandecer o propósito que animou o momento primeiro. As capas do tempo únense ás obras e explícanas, o que nos permite unha observación renovada que, pola súa vez, fai posible unha apreciación depurada da obra.

Esta conversación proxéctase como o complemento dunha exposición que reforza e actualiza a obra singular de Antón Lamazares.

António Gonçalves (Vila Nova de Famalição, Portugal, 1975)

É licenciado en Artes Plásticas na especialidade de Pintura pola Facultade de Belas Artes da Universidade do Porto. Asistiu a clases na Facultade de Belas Artes de Cuenca no marco do proxecto Erasmus durante o curso académico 1998/1999. Doutorouse en Historia da Arte pola Universitat de les Illes Balears en Palma de Mallorca.

Desenvolveu a súa actividade como pintor e comisario e, na actualidade, dirixe o Museu Nogueira da Silva, dependente da Universidade do Minho, en Braga. É, ademais, director da Casa-Museo de Monção, adscrita a esa mesma universidade, e é comisario da galería Ala da Frente, en Vila Nova de Famalição. É profesor convidado na Facultade de Belas Artes do Porto.

Xosé Luís García Canido (Vigo, Pontevedra, 1967)

Xornalista e licenciado en Filoloxía Hispánica, García Canido desenvolveu a súa traxectoria profesional ao redor de dous eixes: a comunicación e a xestión cultural. Impartiu clases en programas de mestrado e conferencias sobre Comunicación e Xestión Cultural en universidades como a Carlos III, Menéndez Pelayo (UIMP), Rey Juan Carlos I, Granada, Barcelona, Complutense de Madrid, Nova York etc.

Foi comisario ou coordinador de máis de cincocentas exposicións; entre elas, Detrás do espello (Museo Gaiás), La odisea americana, 1945-1980 (CUNY, Círculo de Belas Artes, Madrid; Centro de Arte Contemporánea de Salamanca); Egiptología española (Museo Nacional do Cairo); Arte español 1957-2007 (Palazzo Sant’Elia, Palermo); e de artistas ou escritores como José Lezama Lima, Wifredo Lam ou Menchu Lamas.

Bernardo Pinto de Almeida (Peso da Régua, Portugal, 1954)

Catedrático de Teoría e Historia da Arte da Facultade de Belas Artes da Universidade do Porto e membro entre 1990 e 1996 da Comisión de Compras da Fundación de Serralves, organizou a colección de arte portuguesa contemporánea do MEIAC. Foi director artístico da Fundación Cupertino de Miranda, onde fundou o Centro de Estudos do Surrealismo e organizou exposicións. Actualmente, é director artístico do Centro Júlio/Saul Dias en Vila do Conde.

Como comisario independente, é responsable de máis dun centenar de exposicións en diversos museos e institucións portuguesas e españolas. Escribiu máis de cincocentos textos para catálogos tanto en Portugal como fóra do seu país. Colaborou en revistas especializadas como Lápiz, Arte y Parte, Artforum ou Contemporanea, entre outras.

Entrada libre e gratuíta ata que se complete a capacidade da sala