• Contacto
• Mapa web
• Accesibilidade
• The Galician Culture
• La Cultura Gallega

Noticias: PATRIMONIO CULTURAL

O Museo do Castro de Viladonga explica a través dunha mostra o proceso de restauración dunha ola castrexa

[15/08/2012] A exposición, que se inaugura mañá, amósalle á cidadanía o proceso de reconstrución dun tipo cerámico utilizado xa desde o século IV a.C. e ata o III d.C.

A Consellería de Cultura, Educación e Ordenación Universitaria expón, a partir de mañá, a ola castrexa que os especialistas do Museo do Castro de Viladonga, no concello lucense de Castro de Rei, levan restaurando durante anos de minucioso traballo, a través dunha mostra realizada polo equipo técnico do centro baixo a coordinación da súa restauradora Carolina Pérez Pérez.

O proceso de restauración dunha ola castrexa, nova exposición temporal deste centro dependente da Consellería, servirá para darlle a coñecer á cidadanía un tipo cerámico moi habitual no noroeste da Península durante séculos, que se utilizou polo menos entre o IV a.C. e o III d.C.

A ola castrexa, que se expón por primeira vez, é un recipiente de uso doméstico duns 26 litros de capacidade froito do rigoroso labor de restauración realizado sobre 93 fragmentos cerámicos aparecidos nas escavacións arqueolóxicas levadas a cabo neste castro por Manuel Chamoso Lamas nos anos setenta do século pasado.

A mostra explica en seis paneis, cunha detallada información escrita e gráfica, as distintas fases do traballo de restauración. Así permite, ademais de amosar o interese arqueolóxico da peza, coñecer os antigos procesos técnicos de fabricación.

Con esta exposición, a Consellería pon en valor ademais o traballo que se realiza sobre un patrimonio ás veces moi fragmentario pero que ofrece sempre importantes informacións históricas engadidas ao seu valor propiamente cultural.